ສູນຄົ້ນຄ້ວາແນວຄິດໄກສອນ ພົມວິຫານ ແລະ ນັກວິທະຍາສາດ ເຄື່ອນໄຫວວຽກງານ ແລະ ເກັບກຳຂໍ້ມູນຢູ່ແຂວງຜົ້ງສາລີ

ລາຍລະອຽດ

ສ້າງຂື້ນເມື່ອ ວັນພຸດ, 11 ມັງກອນ 2023 08:55

ຂຽນໂດຍ ແສງຄຳ ສາລີວັນ

ສູນຄົ້ນຄ້ວາແນວຄິດ ໄກສອນ ພົມວິຫານ ແລະ ນັກວິທະຍາສາດ ເຄື່ອນໄຫວວຽກງານ ແລະ ເກັບກຳຂໍ້ມູນຢູ່ແຂວງຜົ້ງສາລີ

     ໃນຕອນເຊົ້າຂອງວັນທີ 9 ມັງກອນ 2022 ນີ້, ທາງສູນຄົ້ນຄ້ວາແນວຄິດໄກສອນ ພົມວິຫານ, ສະຖາບັນການເມືອງ ແລະ ການປົກຄອງແຫ່ງຊາດ ພ້ອມດ້ວຍນັກວິທະຍາສາດ ເຊິ່ງນຳໂດຍທ່ານ ປະລິນຍາເອກ ເດັງຢ່າງ ກົງຈີ ຮອງຫົວໜ້າສູນຄົ້ນຄ້ວາແນວຄິດໄກສອນ ພົມວິຫານ, ສະຖາບັນການເມືອງ ແລະ ການປົກຄອງແຫ່ງຊາດ ພ້ອມດ້ວຍຄະນະໄດ້ເຄື່ອນໄຫວ ແລະ ເກັບກຳຂໍ້ມູນກ່ຽວກັບການເຄື່ອນໄຫວຂອງປະທານ ໄກສອນ ພົມວິຫານ ຢູ່ແຂວງຜົ້ງສາລີ ໂດຍການຕ້ອນຮັບ ແລະ ເຂົ້າປະຊຸມຮ່ວມຂອງທ່ານ ນາງ ຈັນມະນີ ນາມວົງ ກຳມະການພັກແຂວງ, ຫົວໜ້າຄະນະໂຄສະນາອົບຮົມແຂວງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

        ໃນໂອກາດນີ້, ທ່ານ ນາງ ຈັນມະນີ ນາມວົງ ກຳມະການພັກແຂວງ, ຫົວໜ້າຄະນະໂຄສະນາອົບຮົມແຂວງ ກໍ່ໄດ້ກ່າວສະແດງຄວາມຕ້ອນຮັບ ແລະ ຕິລາຄາສູງຕໍ່ການມາເຄື່ອນໄຫວວຽກງານຂອງ ສູນຄົ້ນຄ້ວາແນວຄິດໄກສອນ ພົມວິຫານ ໃນຄັ້ງນີ້, ພ້ອມທັງ ລາຍງານກ່ຽວກັບສະພາບຈຸດພິເສດທີ່ຕັ້ງຂອງແຂວງ ແລະ ການພັດທະນາເສດຖະກິດ - ສັງຄົມຂອງແຂວງໃນໄລຍະທີ່ຜ່ານມາໃຫ້ຄະນະຮັບຊາບ. ຈາກນັ້ນທ່ານ ປະລິນຍາເອກ ເດັງຢ່າງ ກົງຈີ ຮອງຫົວໜ້າສູນຄົ້ນຄ້ວາແນວຄິດໄກສອນ ພົມວິຫານ, ສະຖາບັນການເມືອງ ແລະ ການປົກຄອງແຫ່ງຊາດ ກໍ່ໄດ້ສະເໜີແຈ້ງຈຸດປະສົງຫຼັກຂອງການມາເຄື່ອນໄຫວວຽກງານຢູ່ແຂວງຜົ້ງສາລີໃນຄັ້ງນີ້, ໂດຍສະເພາະກໍ່ເພື່ອມາເກັບກຳຂໍ້ມູນທີ່ເປັນເອກະສານ, ຮູບພາບ, ວິດີໂອ ທີ່ກ່ຽວຂ້ອງກັບ ປະທານ ໄກສອນ ພົມວິຫານ ເຊິ່ງຂໍ້ມູນດັ່ງກ່າວແມ່ນຈະໄດ້ນຳໄປໃຊ້ 2 ເປົ້າໝາຍຄື: ເປັນຂໍ້ມູນໃຫ້ນັກວິທະຍາສາດ ຂຽນບົດ ໃນຫົວຂໍ້ຊີວິດ ພາລະກິດ ປະທານ ໄກສອນ ພົມວິຫານ ແຕ່ປີ 1955 – 1975 ແລະ ເປັນຂໍ້ມູນທີ່ຈະພິມ ນິພົນຄົບຊຸດ ໄກສອນ ພົມວິຫານ.

     ຈາກນັ້ນ, ບັນດາທ່ານ ທີ່ເຂົ້າຮ່ວມກອງປະຊຸມ ໄດ້ພ້ອມກັນແລກປ່ຽນຄຳຄິດຄຳເຫັນໃນການເກັບກຳຂໍ້ມູນກ່ຽວກັບການເຄື່ອນໄຫວຂອງທ່ານ ປະທານ ໄກສອນ ພົມວິຫານ ຢູ່ແຂວງຜົ້ງສາລີ ເປັນຕົ້ນກະແມ່ນຂໍ້ມູນເອກະສານ, ຮູບພາບ ແລະ ວິດີໂອ ເພື່ອໃຫ້ໄດ້ຫຼາຍທີ່ສຸດ ໃນການປະກອບໃສ່ບົດຕ່າງໆເພື່ອໃຫ້ມີເນື້ອໃນຄົບຖ້ວນ, ຊັດເຈນ ແລະ ຖືກຕ້ອງ.

• < ຕໍ່ໄປ
• ຕໍ່ໄປ >