ກຳມະບານຮາກຖານ ຄະນະໂຄສະນາອົບຮົມແຂວງຜົ້ງສາລີ ສຳເລັດການປະເມີນສະມາຊິກກຳມະບານ 5 ເປັນເຈົ້າ ປະຈຳປີ 2023

ລາຍລະອຽດ: ສ້າງຂື້ນເມື່ອ ວັນພຸດ, 25 ຕຸລາ 2023 04:09; ຂຽນໂດຍ Bounsouly Loma

ກຳມະບານຮາກຖານ ຄະນະໂຄສະນາອົບຮົມແຂວງຜົ້ງສາລີ

ສຳເລັດການປະເມີນສະມາຊິກກຳມະບານ 5 ເປັນເຈົ້າ ປະຈຳປີ 2023

ເພື່ອປະຕິບັດຕາມແຈ້ງການແນະນຳ ຂອງສະຫະພັນກຳມະບານແຂວງ ສະບັບເລກທີ 421/ ສກຂ ຜລ, ລົງວັນທີ 5 ກໍລະກົດ 2023 ວ່າດ້ວຍການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ປະຈຳປີ 2023.

ໃນຕອນເຊົ້າຂອງວັນທີ 17 ຕຸລາ 2023 ນີ້ກຳມະບານຮາກຖານ ຄະນະໂຄສະນາອົບຮົມແຂວງ ໄດ້ຈັດໃຫ້ມີກອງປະຊຸມປະເມີນຂໍ້ແຂ່ງຂັນ 5 ເປັນເຈົ້າ ປະຈຳປີ 2023 ຂຶ້ນຢ່າງເປັນທາງການ ທີ່ຫ້ອງປະຊຸມຂອງຄະນະໂຄສະນາອົບຮົມແຂວງ ໂດຍການເປັນປະທານຂອງ ສະຫາຍ ສົມຕຸ້ຍ ສຸວັນນະຄຳ, ຫົວຫນ້າຂະແໜງອົບຮົມ, ຮອງປະທານກຳມະບານຮາກຖານ ຄະນະໂຄສະນາອົບຮົມແຂວງ, ມີສະມາຊິກກຳມະບານພາຍໃນກຳມະບານຄະນະໂຄສະນາອົບຮົມແຂວງ ເຂົ້າຮ່ວມທັງໝົດ 15 ສະຫາຍ, ຍິງ 9 ສະຫາຍ.

ການປະເມີນຜົນຄັ້ງນີ້ ກໍເພື່ອຕີລາຄາຜົນງານດ້ານດີ ແລະ ດ້ານອ່ອນຂໍ້ຄົງຄ້າງຂອງແຕ່ລະສະຫາຍ ຕະຫຼອດໄລຍະ 1 ປີຜ່ານມາ ພ້ອມທັງ ມີການຕຳນິຕິຊົມເຊິ່ງກັນ ແລະ ກັນ ດ້ວຍຄວາມຈິງໃຈ ເພື່ອພ້ອມກັນກ້າວໜ້າ ແລະ ມີຄວາມເປັນເອກະພາບກັນໃນການປະຕິບັດຕາມເນື້ອໃນຂໍ້ແຂ່ງຂັນ 5 ເປັນເຈົ້າ ປະຈຳປີ 2023 ເອົາໃຈໃສ່ປະຕິບັດວຽກງານຕາມແຕ່ລະໄລຍະທີ່ທາງສູນກາງສະຫະພັນກຳມະບານລາວ ກໍຄືຂອງ ສະຫະພັນ ກຳມະບານ ແຂວງຜົ້ງສາລີ ວາງອອກ ໃຫ້ໄດ້ຮັບຜົນດີກວ່າເກົ່າ.

ການປະເມີນຂໍ້ແຂ່ງຂັນ 3 ດີ ປະຈຳປີ 2023 ຂອງກຳມະບານຮາກຖານ ຄະນະໂຄສະນາອົບຮົມແຂວງໃນຄັ້ງນີ້ ບັນດາສະຫາຍ ສະມາຊິກກຳມະບານ ພາຍໃນຄະນະໂຄສະນາອົບຮົມແຂວງ ໄດ້ພ້ອມກັນຕີຄະແນນໃສ່ໃບປະເມີນຜົນຂອງຕົນເອງຕາມແຕ່ລະມາດຖານ ພ້ອມທັງປະເມີນຂອງໜ່ວຍກຳມະບານຮາກຖານຄະນະໂຄສະນາອົບຮົມແຂວງຕື່ມອີກ.

ໃນຕອນທ້າຍ ສະຫາຍ ສົມຕຸ້ຍ ສຸວັນນະຄຳ ຫົວຫນ້າຂະແໜງອົບຮົມ, ຮອງປະທານກຳມະບານຮາກຖານ ຄະນະໂຄສະນາອົບຮົມແຂວງ ຍັງໄດ້ໂອ້ລົມຕໍ່ສະມາຊິກກຳມະບານພາຍໃນໜ່ວຍ ຊຶ່ງກ່ອນອື່ນ ສະຫາຍ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານຂອງສະມາຊິກກຳມະບານແຕ່ລະສະຫາຍ ທີ່ຍາດມາໄດ້ໃນໄລຍະ 1 ປີ ຜ່ານມາ ເຊິ່ງການໂອ້ລົມຂອງທ່ານໄດ້ເນັ້ນຫນັກເຖິງການຈັດຕັ້ງປະຕິບັດຂໍ້ແຂ່ງຂັນ 5 ເປັນ ເຈົ້າ ເພື່ອເປັນບ່ອນອີງໃຫ້ແກ່ການເຄື່ອນໄຫວວຽກງານກໍາມະບານໃຫ້ດີກວ່າເກົ່າ.