ແຂວງຜົ້ງສາລີສຳເລັດກອງປະຊຸມອົງການປົກຄອງແຂວງປະຈຳ 6 ເດືອນ ຕົ້ນປີ 2020

ສ້າງຂື້ນເມື່ອ ວັນພຸດ, 01 ກໍລະກົດ 2020 09:56
ຂຽນໂດຍ Bounsouly Loma

ແຂວງ ​ຜົ້ງສາລີ

ສຳເລັດກອງປະຊຸມອົງການປົກຄອງແຂວງ​ ປະຈຳ 6 ເດືອນ ຕົ້ນປີ 2020.

         ກອງ​ປະ​ຊຸມອົງ​ການ​ປົກ​ຄອງ​ແຂວງ​ປະ​ຈຳ 6 ເດືອນ​ຕົ້​ນປີ 2020 ໄດ້​ໄຂ​ຂື້ນ​ໃນ​ຕອນ​ເຊົ້າ​ຂອງວັນ​ທີ່ 29 ມິ​ຖຸ​ນາ  ແລະ ໄດ້​ປິດ

ລົງ​ດ້ວຍ​ຜົນ​ສຳ​ເລັດ​ອັນ​ຈົບ​ງານ​ໃນ​ຕອນ​ບ່າຍ​ຂອງວັນ​ທີ່ 30 ມິ​ຖຸ​ນາ 2020 ທີ່​ຫ້ອງ​ປະ​ຊຸມ​ຂອງ​ຫ້ອງ​ວ່າ​ການ​ແຂວງ ໂດຍ​ພາຍ​ໃຕ້​ການ​ເປັນ​ປະ​ທານ​ຂອງ​ທ່ານ ຄຳ​ຜອຍ ວັນ​ນະ​ສານ ຮັກ​ສາ​ການ​ເລ​ຂາ​ພັກ​ແຂວງ, ເຈົ້າ​ແຂວງໆ​ຜົ້ງ​ສາ​ລີ, ມີ​ບັນ​ດາ​ສະ​ຫາຍ​ກຳ​ມ​ະ​ການ​ປະ​ຈຳ​ພັກ​ແຂວງ, ​ກຳ​ມະ​ການ​ພັກ​ແຂວ​ງ, ຫົວ​ໜ້າ - ຮອງ​ຫົ​ວ​ໜ້າ​ພະ​ແນກ​ການ, ເຈົ້າ​ເມືອງ - ຮອງ​ເຈົ້າ​ເມືອງ 7 ເມືອງ, ກອງບັນຊາການ ປກສ - ປກຊ, ບັນ​ດາ​ລັດ​ວິ​ສະ​ຫະ​ກິດ​ອ້ອມ​ຂ້າງ​ແຂວງ, ສະ​ພາ​ປະ​ຊາ​ຊົນ​ແຂວງ, ສະ​ພາ​ການ​​​ຄ້າ​ແຂວງ ​ຕະ​ຫຼອດ​ຮອດ​ສະ​ມາ​ຊິກ​ອົງ​ການ​ປົກ​ຄອງແຂວງ ແລະ ພາກ​ສ່ວນ​ທີ່​ກ່ຽວ​ຂ້ອງ​ເຂົ້າ​ຮ່ວມ.

      ໃນກອງ​ປະ​ຊຸມ​ທ່ານ​ ທອງ​ສີ ເສົາ​ສຸ​ລິ​ພົມ ຮອງ​ເຈົ້າ​ແຂວງໆແຂວງ​ຜົ້ງ​ສາ​ລີ ກໍ່​ໄດ້​ຂຶ້ນ​ລາຍ​ງານການຈັດຕັ້ງປະຕິບັດວຽກງານຂອງອົງການປົກຄອງໃນ 6 ເດືອນ​ຕົ້ນປີ ແລະ ແຜນວຽກຈຸດສຸມໃນ 6 ເດືອນທ້າຍປີ 2020 ເຊິ່ງໃນໄລຍະ 6 ເດືອນຕົ້ນປີ 2020 ຜ່ານມາເຖິງວ່າສະພາບແວດລ້ອມຂອງໂລກ, ພາກພື້ນຜັນແປດ້ວຍຫຼາຍຮູບຫຼາຍສີ, ສະຫຼັບສະຊ້ອນ ພາຍ ໃນປະເທດກໍ່ຄືແຂວງຜົ້ງສາລີ ກໍ່ສືບຕໍ່ມີຄວາມຫຍຸ້ງຍາກ ແລະ ສິ່ງທ້າທາຍຫຼາຍດ້ານ ເປັນຕົ້ນແມ່ນຄວາມຫຍຸ້ງຍາກທາງດ້ານເສດຖະກິດ-ການເງິນ, ພວກສັດຕູ ແລະ ກຸ່ມຄົນບໍ່ດີກໍ່ສືບຕໍ່ກໍ່ກວນດ້ວຍຫຼາຍຮູບແບບ, ສະພາບດິນຟ້າອາກາດປ່ຽນແປງຜິດປົກກະຕິ ເປັນຕົ້ນໄພແຫ້ງແລ້ງ, ພະຍຸພະຍາດລະບາດເປັນຕົ້ນ: ພະຍາດປາກເປື່ອຍລົງເລັບງົວ-ຄວາຍ, ຝຸ່ງຕັກແຕນໄມ້ປ່ອງ ແລະ ຝຸງບົ້ງສາລີ; ອັນທີ່ຮ້າຍແຮງກວ່ານັ້ນແມ່ນການ​ລະ​ບາດ​ພະ​ຍາດ COVID-19; ເຊິ່ງທັງໝົດນັ້ນ ໄດ້ສົ່ງຜົນກະທົບຕໍ່ການບໍລິຫານວຽກງານ ຂອງອົງການປົກ ຄອງແຂວງບໍ່ໜ້ອຍ. ແຕ່ໂດຍພາຍໃຕ້ການເອົາໃຈໃສ່ຊີ້ນໍາ-ນຳພາ ຂອງການນຳແຂວງ ແລະ ດ້ວຍຄວາມພະຍາຍາມຂອງອົງການປົກຄອງແຂວງ ກໍ່ຄືອົງການປົກຄອງແຕ່ລະຂັ້ນ ເຮັດໃຫ້ການຈັດຕັ້ງປະຕິບັດວຽກງານຂອງອົງການປົກຄອງແຂວງໃນ 6 ເດືອນຕົ້ນປີ 2020 ຜ່ານມາ ໄດ້ຮັບການຈັດຕັ້ງປະຕິບັດ ແລະ ບັນລຸຜົນສຳເລັດໃນຫຼາຍດ້ານ, ເຊິ່ງໄດ້ສະແດງອອກການຈັດຕັ້ງປະຕິບັດ ແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຂອງພັກຢ່າງຕັ້ງໜ້າກວ່າເກົ່າ ໂດຍໄດ້ປັບປຸງຄວາມສາມາດດ້ານຕ່າງໆ ຂອງກໍາລັງທ້ອງ ຖິ່ນ, ທັງສືບຕໍ່ປະຕິບັດມາດຕະການຫັນພະນັກງານລົງຮາກຖານການເມືອງຢູ່ເຂດຫຼໍ່ແຫຼມ ແລະ ເຂດທົ່ວໄປ ເພື່ອປະຕິບັດ 4 ເນື້ອໃນ 4 ຄາດໝາຍ ທັງໄດ້ເອົາໃຈໃສ່ຊຸກຍູ້ການຈັດຕັ້ງປະຕິບັດບັນດາຄາດໝາຍທີ່ໄດ້ວາງໄວ້ ໃນແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII (2016-2020) ກໍ່ຄືຄາດໝາຍຂອງແຜນພັດທະນາເສດຖະກິດ-ສັງຄົມປີ 2020 ດ້ວຍການທົບທວນຄືນການຈັດຕັ້ງປະຕິບັດແຜນພັດທະນາຊົນນະບົດ ແລະ ແກ້ໄຂຄວາມທຸກ ຍາກ, ແຜນການປະຕິບັດ 6 ທາງອອກຂອງແຂວງ; ສືບຕໍ່ຊຸກຍູ້ການຈັດຕັ້ງປະຕິບັດຕາມແລວເສດຖະກິດ ຕິດພັນກັບການແກ້ໄຂຄວາມທຸກຍາກ ແລະ ການປ້ອງກັນຄວາມສະ ຫງົບຕາມແລວ 11,4,5,6 ແລະ 22 ໂດຍປຸກລະດົມ ແລະ ນໍາໃຊ້ທຸກແຫຼ່ງທຶນເຂົ້າໃສ່ການກໍ່ສ້າງໂຄງລ່າງຮັບໃຊ້ແກ່ການພັດທະນາ, ການດໍາລົງຊີວິດ ແລະ ການແກ້ໄຂຄວາມທຸກ ຍາກຂອງປະຊາຊົນ; ຊຸກຍູ້ບັນດາໂຄງການຜະລິດເປັນສິນຄ້າທີ່ມີຕະຫຼາດຮອງຮັບມາແລ້ວນັບທັງໂຄງການປູກ ແລະ ໂຄງການລ້ຽງ; ຄາດວ່າໃນປີ 2020 ລວມຍອດຜະລິດຕະພັນພາຍໃນ GDP ຈະຂະຫຍາຍຕົວໃນລະດັບ 5,10% (ແຜນການ 6,82); ຄາດວ່າລາຍຮັບສະ ເລ່ຍຕໍ່ຫົວຄົນຈະບັນລຸ 988 ໂດລາສະຫະລັດ (ແຜນການ 994 ໂດລາສະຫະລັດ). ໄດ້ເຮັດທົດລອງການເກັບລາຍຮັບຈາກທີ່ດິນຂັ້ນບ້ານ ແລະ ການຈັດຕັ້ງປະຕິບັດວຽກງານການເງິນຂັ້ນບ້ານ ຢູ່ 3 ບ້ານຂອງເມືອງບຸນໃຕ້ ແລ້ວຖອດຖອນບົດຮຽນໄປຈັດຕັ້ງປະຕິບັດຢູ່ບັນ ດາເມືອງໃນທົ່ວແຂວງ, ເຊິ່ງມາຮອດປັດຈຸບັນ ສາມາດຈັດເກັບລາຍຮັບເຂົ້າງົບປະມານໄດ້ທັງໝົດ 31,08 ຕື້ກີບ ເທົ່າກັບ 25,96% ຂອງແຜນການ ໃນນີ້ ລາຍຮັບພູດທ້ອງຖິ່ນໄດ້ 15,33 ຕື້ກີບ ເທົ່າກັບ 17,79% ຂອງແຜນການ ແລະ ພູດສູນກາງໄດ້ 15,76 ຕື້ກີບ ເທົ່າກັບ 48,08% ຂອງແຜນການ; ໂຄງການກໍ່ສ້າງ ແລະ ຍົກຍ້າຍເທດສະບານແຂວງ ກໍໄດ້ສືບຕໍ່ຈັດຕັ້ງປະຕິບັດຕາມແຜນການກໍານົດໄວ້ ແລະ ມີຄວາມຄືບໜ້າຫຼາຍສົມຄວນ ເປັນຕົ້ນແມ່ນການກໍ່ສ້າງຕຶກສໍານັກງານ ຂອງບັນດາພະແນກການ, ການກໍ່ສ້າງເສັ້ນທາງ, ລະບົບໄຟຟ້າ, ນໍ້າປະປາ ແລະ ອື່ນໆ ແລະ ມາຮອດປັດຈຸບັນ ຄວາມຄືບໜ້າຂອງໂຄງການ (11 ໜ້າວຽກ) ບັນລຸໄດ້ເປັນມູນຄ່າປະມານ 75 ລ້ານໂດລາ. ພ້ອມນັ້ນບັນດາຜູ້ແທນກອງປະຊຸມຍັງໄດ້ຮັບຟັງ​ການ​ສະ​ຫຼູບ​ລາຍ​ງານ ການ​ຈັດ​ຕັ້ງ​ປະ​ຕິ​ບັດ​ແຜນ​ພັດ​ທະ​ນາ​ເສດ​ຖະ​ກິດ - ສັງ​ຄົມ ຂອງ​ແຂວງ 6 ເດືອນ​ຕົ້ນ​ປີ, ແຜນ​ວຽກ​ຈຸດ​ສຸມ 6 ເດືອນ​ທ້າຍ​ປີ 2020 ຮ່າງ​ແຜນ​ພັດ​ທະ​ນາ​ເສັດ​ຖະ​ກິດ - ສັງ​ຄົມ ແລະ ແນະ​ນຳ​ການ​ສ້າງ​ແຜນ​ປີ 2021, ການ​ສະ​ຫຼູບ​ລາຍ​ງານການ​ຈັດ​ຕັ້ງ​ປະ​ຕິ​ບັດ​ແຜນງົບ​ປະ​ມານ 6 ເດືອນ​ຕົ້ນ​ປີ, ແຜນ​ວຽກ​ຈຸດ​ສຸມ 6 ເດືອນ​ທ້າຍ​ປີ 2020 ແລະ ແນະ​ນຳ​ການ​ສ້າງ​ແຜນ​ປີ 2021, ການລາຍ​ງານ​ກ່ຽວ​ກັບ​ການ​ປະ​ເມີນ​ຜົນ​ທະ​ທົບ​ຈາກ​ການ​ລະ​ບາ​ດ​ພະ​ຍາດ​ໂຄວິດ 19 ຕໍ່​ເສດ​ຖະ​ກິດ​ພາຍ​ໃນ​ແຂວງ, ​ການລາຍ​ງານ​ກ່ຽວ​ກັບຜົນ​ກອງ​ປະ​ຊຸມ​ສະ​ຫຼູບ​ຕິ​ລາ​ຄາ​ການ​ຈັດ​ຕັ້ງ​ປະ​ຕິ​ບັດ​ນະ​ໂຍ​ບາຍ 6 ທາງ​ອອກ ໃນໄລຍະ 5 ປີ​ຜ່ານ​ມາ (2016 – 2020) ແລະ ທິດ​ທາງ​ແຜນ​ການໃນ 5 ປີ​ຕໍ່​ໜ້າ (2021 – 2025) ຂອງ​ແຂວງ, ການລາຍ​ງານ​ກ່ຽວ​ກັບຜົນ​ກອງ​ປະ​ຊຸມ​ ສະ​ຫຼູບ​ຕິ​ລາ​ຄາ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ພັດ​ທະ​ນາ​ຊົນ​ນະ​ບົດ ແລະ ແກ້​ໄຂ​ຄວາມ​ທຸກ​ຍາກ​ໃນ 5 ປີ​ຜ່ານ​ມາ (2016 – 2020) ແລະ ທິດ​ທາງ​ແຜນ​ການ​ໃນ 5 ປີ ​ຕໍ່​ໜ້າ (2021 – 2025) ຂອງ​ແຂວງ ຕາມ​ດຳ​ລັດ 348/ລບ, ລວມທັງ​ການ​ຍົກ​ຍ້າຍ​ບ້ານ ແລະ ໂຮມ​ບ້ານ, ການລາຍ​ງານ​ກ່ຽວ​ກັບການ​ຄົ້ນ​ຄວ້າ​ກຳ​ນົດ​ລາ​ຄາ​ທີ່​ດິນຢູ່ 7 ເມືອງ​ພາຍ​ໃນ​ແຂວງ, ການລາຍ​ງານ​ກ່ຽວ​ກັບແຜນ​ຄຸ້ມ​ຄອງ​ ການ​ປຸກ​ສ້າງ​ຢູ່​ເທດ​ສະ​ບານ​ແຂວງ​ທີ່​ບຸນ​ເໜືອ, ​ການລາຍ​ງານ​ກ່ຽວ​ກັບແຜນ​ຈັດ​ສັນ ແລະ ແຜນ​ພັດ​ທະ​ນາເທດ​ສະ​ບານ​ແຂວງທີ່​ບຸນ​ເໜືອ, ຟັງ​ການ​ລາຍ​ງານ​ແຜນ​ຈັດ​​ສັນ ແລະ ພັດ​ທ​ະ​ນາ​ຕົວ​ເມືອງ​ນ້ອຍ ຢູ່ບ້ານ​ຢໍ້. ພ້ອມກັນນັ້ນ, ຜູ້ແທນກອງປະຊຸມຍັງໄດ້ສຸມໃສ່ຄົ້ນຄວ້າປະກອບຄຳຄິດຄຳເຫັນຢ່າງກົງໄປກົງມາໃສ່ບັນດາຮ່າງເອກະສານຕ່າງໆ ໂດຍສະເພາະແມ່ນບັນດາຄາດໝາຍສູ້ຊົນ 6 ເດືອນທ້າຍປີ ໃນການຈັດຕ່າງປະຕິບັດວຽກງານຕ່າງໆໃຫ້ມີຜົນສຳເລັດກວ່າເກົ່າ.

       ໃນໂອກາດນີ້ ທ່ານ ຄຳ​ຜອຍ ວັນ​ນະ​ສານ ເຈົ້າ​ແຂວງໆ​ຜົ້ງ​ສາ​ລີ ຍັງໄດ້ຮຽກຮ້ອງມາຍັງຜູ້ເຂົ້າຮ່ວມກອງປະຊຸມທຸກໆທ່ານ ຈົ່ງພ້ອມກັນເປັນເຈົ້າການນຳກັນໃນການນຳເອົາເນື້ອໃນຈິດໃຈຂອງກອງປະຊຸມຄັ້ງນີ້ໄປຜັນຂະຫຍາຍ ແລະ ໝູນໃຊ້ເຂົ້າໃນການຈັດຕັ້ງປະຕິບັດແຕ່ລະຂົງເຂດວຽກງານເພື່ອສູ້ຊົນໃຫ້ໄດ້ຕາມຄາດໝາຍທີ່ວາງໄວ້ໃນ 6 ເດືອນທ້າຍປີ.