ແຂວງຜົ້ງສາລີ ສໍາເລັດກອງປະຊຸມຄົບຄະນະບໍລິຫານງານພັກແຂວງຄັ້ງທີ 11 ສະໄໝທີ X

ສ້າງຂື້ນເມື່ອ ວັນຈັນ, 06 ກໍລະກົດ 2020 03:51
ຂຽນໂດຍ Bounsouly Loma

 

ແຂວງ​ຜົ້ງ​ສາ​ລີ​ ສໍາ​ເ​ລັດກອງ​ປະ​ຊຸມຄົບ​ຄະ​ນະ​ບໍ​ລິ​ຫານ​ງານ​ພັກ​ແຂວງ​ຄັ້ງ​ທີ 11 ສະ​ໄໝ​ທີ X

      ກອງ​ປະ​ຊຸມຄົບ​ຄະ​ນະ​ບໍ​ລິ​ຫານ​ງານ​ພັກ​ແຂວງ​ຄັ້ງ​ທີ 11 ສະ​ໄໝ​ທີ X ໄດ້​ໄຂ​ຂຶ້ນ​ໃນ​ຕອນ​ເຊົ້າ​ຂອງວັນ​ທີ 2 ກໍ​ລະ​ກົດ  ແລະ ໄດ້​ອັດ​ລົງ​ດ້ວຍ​ຜົນ​ສຳ​ເລັດ

​ອັນ​ຈົບ​ງານ​ໃນ​ຕອນ​ບ່າຍ​ຂອງວັນ​ທີ 3 ກໍ​ລະ​ກົດ 2020 ໂດຍ​ພາຍ​ໃຕ້​ການ​ເປັນ​ປະ​ທານ​ຂອງ​​ ສະ​ຫາຍ ຄຳ​ຜອຍ ວັນ​ນະ​ສານ ຮັກ​ສາ​ການ​ເລ​ຂາ​ພັກ​ແຂວງ, ເຈົ້າ​ແຂວງໆ​ຜົ້ງ​ສາ​ລີ, ມີ​ບັນ​ດາ​ສະ​ຫາຍ​ກຳ​ມ​ະ​ການ​ປະ​ຈຳ​ພັກ​ແຂວງ, ​ກຳ​ມະ​ການ​ພັກ​ແຂວ​ງ ພ້ອ​ມ​ດ້ວຍ​ພາກ​ສ່ວນ​ທີ່​ກ່ຽວ​ຂ້ອງ​ເຂົ້າ​ຮ່ວມ.

      ໃນກອງ​ປະ​ຊຸມ ​ບັນດາ​ຜູ້​ເຂົ້າ​ຮ່ວມໄດ້​ຮັ​ບ​ຟັງ​ບັນ​ດາ​ເອ​ກະ​ສານ​ທີ່​ສຳ​ຄັນ​ຂອງ​ພັກ-ຂອງ​ຊາດ ແລະ ຂອງ​ແຂວງ, ໂດຍ​ສະ​ເພາະ​ແມ່ນ​ໄດ້​ຮັບ​ຟັງ​ເອ​ກະ​ສານ ຜົນ​ສຳ​ເລັດ​ກອງ​ປະ​ຊຸມ​ຄົບ​ຄະ​ນະ​ບໍ​ລິ​ຫານ​ງານ​ສານ​ກາງ​ພັກ​ຄັ້ງ​ທີ 10 ສະ​ໄໝທີ X, ​ການ​ສະ​ຫຼູບ​ລາຍ​ງານ​ການ​ຈັດ​ຕັ້ງ​ປະ​ຕິ​ບັດ​ມະ​ຕິ​ກອງ​ປະ​ຊຸມ​ຄົບ​ຄະ​ນະ​ບໍ​ລິ​ຫານ​ງານ​ພັກ​ແຂວງ ຄັ້ງ​ທີ 10 ສະ​ໄໝ​ທີ X ແລະ ວຽກ​ງານ​ຮອບ​ດ້ານ​ຂອງ​ແຂວງ 6 ເດືອນ​ຕົ້ນ​ປີ ແລະ ແຜນ​ວຽກ​ຈຸດສຸມ 6 ເດືອນທ້າຍ 2020, ​ການ​ລາຍ​ງານ​ຜົນ​ຂອງກອງ​ປະ​ຊຸມ​ອົງ​ການ​ປົກ​ຄອງ​ແຂວງ​ປະ​ຈຳ 6 ເດືອນ​ຕົ້ນ​ປີ 2020, ຮ່າງ​ລາຍ​ງານ​ການ​ເມືອງ​ທີ່​ຈະ​ສະ​ເໜີ​ຕໍ່​ກອງ​ປະ​ຊຸມ​ໃຫ​ຍ່​ຄັ້ງ​ທີ XI ຂອງ​ອົງ​ຄະ​ນະ​ພັກ​ແຂວງ, ​ຮ່າງ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ 5 ປີ ຄັ້ງ​ທີ IX ( 2021-2025 ). ຈາກນັ້ນ​ບັນ​ດາສະ​ຫາຍ​ຄະ​ນະ​ບໍ​ລິ​ຫານ​ງານ​ພັກ​ແຂວງ ກໍ່​ໄດ້​ພ້ອມ​ກັນ​ຄົ້ນ​ຄວ້າ​ປະ​ກອບ​ຄຳ​ຄິດ​ຄຳ​ເຫັນ​ໃສ່​​ບັນ​ດາ​ເອ​ກະ​ສານ​ຕ່າງໆ ໂດຍ​ສະ​ເພາະ​ແມ່ນຜົນ​ຂອງກອງ​ປະ​ຊຸມ​ອົງ​ການ​ປົກ​ຄອງ​ແຂວງ​ປະ​ຈຳ 6 ເດືອນ​ຕົ້ນ​ປີ 2020, ​ຮ່າງ​ລາຍ​ງານ​ການ​ເມືອງ​ທີ່​ຈະ​ສະ​ເໜີ​ຕໍ່​ກອງ​ປະ​ຊຸມ​ໃຫ​ຍ່​ຄັ້ງ​ທີ XI ຂອງ​ອົງ​ຄະ​ນະ​ພັກ​ແຂວງ, ​ຮ່າງ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ 5 ປີ ຄັ້ງ​ທີ IX ( 2021-2025 ) ທີ່​ເຫັນ​ວ່າ​ຍັງ​ບໍ່​ທັນ​ສອດ​ຄ່ອງ​​ບັນ​ດາ​ເນື້ອ​ໃນ, ຕົວ​ເລກ​ຄາດ​ໝາຍ​ຕ່າງ​ໆ ທັງ​ນີ້ກໍ່​ເປັນ​ເອ​ກະ​ພາບ​ພາຍ​ໃນ​ຄະ​ນະ​ບໍ​ລິ​ຫານ​ພັກ​ແຂວງ ​ທີ່​ຈະ​ນຳ​ສະ​ເໜີ​ຕໍ່​ກອງ​ປະ​ຊຸມ​ສະ​ພາ​ປະ​ຊາ​ຊົນ​ແຂວງ​ເພື່ອພິ​ຈາ​ລະ​ນາ​ຮັບ​ຮອງ.

      ໂອ​ກາດກອງປະຊຸມຄັ້ງນີ້ ​ສະ​ຫາຍ​ ຄຳ​ຜອຍ ວັນ​ນະ​ສານ ຮັກ​ສາ​ການ​ເລ​ຂາ​ພັກ​ແຂວງ, ເຈົ້າ​ແຂວງໆ​ຜົ້ງ​ສາ​ລີ, ຍັງໄດ້ຮຽກຮ້ອງມາຍັງຜູ້ເຂົ້າຮ່ວມກອງປະຊຸມທຸກໆສະ​ຫາຍ ຈົ່ງພ້ອມກັນເປັນເຈົ້າການນຳການໃນການປັບ​ປຸງ​ຄືນ​ບາງ​ເນື້ອ​ໃນ, ເປັນ​ຕົ້ນຕົວ​ເລກ​ຄາດ​ໝາຍ​ຕ່າງໆ​ຂອງ​ແຕ່​ລະ​ຂົງ​ເຂດ ​ທີ່​ເຫັນ​ວ່າ​ຍັງ​ບໍ່​ທັນ​ເໝາະ​ສົມ, ພ້ອມ​ທັງນຳເອົາເນື້ອໃນຈິດໃຈຂອງກອງປະຊຸມຄັ້ງນີ້ໄປຜັນຂະຫຍາຍ ແລະ ໝູນໃຊ້ເຂົ້າໃນການຈັດຕັ້ງປະຕິບັດ ເພື່ອສູ້ຊົນໃຫ້ໄດ້ຕາມຄາດໝາຍທີ່ວາງໄວ້.