ເມືອງສຳພັນ ປາຖະກະຖາ 5 ວັນປະຫວັດສາດສຳຄັນ ປະຈຳເດືອນຕຸລາ

ສ້າງຂື້ນເມື່ອ ວັນອັງຄານ, 20 ຕຸລາ 2020 03:41
ຂຽນໂດຍ ນັກຂ່າວເມືອງສຳພັນ

ເມືອງສຳພັນ ປາຖະກະຖາ 5 ວັນປະຫວັດສາດສຳຄັນ ປະຈຳເດືອນຕຸລາ

  ເພື່ອເປັນການທົບທວນຫວນຄືນວັນສໍາຄັນທາງປະຫວັດສາດຂອງພັກ, ຂອງຊາດ ແລະ ຂອງສາກົນນັ້ນວັນທີ 16 ຕຸລາ 2020 ນີ້ທາງຄະນະໂຄສະນາອົບຮົມເມືອງສໍາພັນແຂວງຜົ້ງສາລີ

ໄດ້ຈັດພິທີປາຖະກະຖາ 5 ວັນປະຫວັດ ສາດຂື້ນຢູ່ທີ່ສະໂມສອນຂອງເມືອງ ໂດຍການເປັນປະທານຂອງທ່ານ ນາງ ວົງເພັດ ພັນປັນຍາ ກຳມະການພັກເມືອງ-ຫົວໜ້າຄະນະໂຄສະນາອົບຮົມເມືອງສໍາພັນ ແລະ ເປັນກຽດເຂົ້າຮ່ວມຂອງທ່ານ ນາງ ຈັນສະໄໝ ລາວຊ່ຽວຄະນະປະຈຳພັກເມືອງ, ຫົວໜ້າຄະນະຈັດຕັ້ງເມືອງ, ມີບັນດາກຳມະການພັກເມືອງ, ຫົວໜ້າຫ້ອງການ, ພະນັກ ງານລັດຖະກອນ, ກອງບັນຊາການທະຫານ, ຕໍາຫລວດ ຕະຫລອດຮອດລັດວິສາຫະກິດອ້ອມຂ້າງເທດສະບານເມືອງເຂົ້າຮ່ວມຮັບຟັງທັງໝົດ 136 ຄົນ, ຍິງ 45 ຄົນ, ໃນນີ້ສະມາຊິກພັກມີ 108 ສະຫາຍ, ຍິງ 36 ສະຫາຍ.

     ໃນພິທີ, ທ່ານຫົວໜ້າຄະນະໂຄສະນາອົບຮົມເມືອງ ແລະ ຮອງຫົວໜ້າຄະນະໂຄສະນາອົບຮົມເມືອງ ກໍ່ໄດ້ພັດປ່ຽນກັນຂຶ້ນປາຖະກະຖາເນື້ອໃນ 5 ວັນປະຫວັດສາດຄື: ລະນຶກວັນສາກົນ ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກຂອງ ສປປ ລາວ ຄົບຮອບ 17ປີ, ວັນປະກາດເອກະລາດຄົບຮອບ 75 ປີ, ວັນຍຶດອຳນາດຄົບຮອບ 75 ປີ, ວັນສ້າງຕັ້ງການທູດລາວຄົບຮອບ 75 ປີ ແລະ ວັນຄູແຫ່ງຊາດຄົບຮອບ 26 ປີ. ຈຸດປະສົງຂອງການປາຖະກະຖາ 5 ວັນປະຫວັດສາດຄັ້ງນີ້ ກໍ່ເພື່ອແນໃສ່ການສຶກສາອົບຮົມໃຫ້ແກ່ສະມາຊິກພັກ, ພະນັກງານ-ລັດຖະກອນ, ນາຍ ແລະ ພົນທະຫານ, ນາຍ ແລະ ພົນຕໍາຫລວດ ແລະ ພະນັກງານຂົງເຂດລັດວິສາຫະກິດ ມີຄວາມຮັບຮູ້ ແລະ ເຂົ້າໃຈກ່ຽວກັບປະຫວັດຄວາມເປັນມາ ແລະ ການຈະເລີນເຕີບໃຫຍ່ຂະຫຍາຍຕົວຂອງວັນສໍາຄັນຕ່າງໆໃຫ້ເລິກເຊິ່ງ ແລະ ເຫັນໄດ້ຄວາມໝາຍຄວາມສໍາຄັນດ້ານປະຫວັດສາດ; ວັນສ້າງຕັ້ງການທູດລາວເຊິ່ງໄດ້ສ້າງຄວາມສາມັກຄີສາມຊາດລາວອິນດູຈີນ ໄດ້ເປັນຂີດໝາຍສໍາຄັນເປັນກຳລັງເພື່ອຕໍ່ສູ້ກັບພວກລ່າເມືອງຂຶ້ນ ຝຣັງ, ວັນປະກາດເອກະລາດໄດ້ເປັນຂີດໝາຍແຫ່ງໄຊຊະນະຂອງການຕໍ່ສູ້ຢ່າງພິລະອາດຫານ ແລະ ໃຫຍ່ຫລວງຂອງກອງທັບລາວ, ລະນຶກສາກົນ ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກຂອງ ສປປ ລາວ.ແລະວັນຊາດ ສປ ຈີນ ເຊິ່ງມັນແມ່ນບາດລ້ຽວອັນຍິ່ງໃຫຍ່ທີ່ມີຄວາມມີສະຫວ່າງສະໄຫວ ໃນການຂະຫຍາຍຕົວດ້ານການພັດທະນາເສດຖະກິດ-ສັງຄົມຢ່າງເຫັນແຈ້ງ.

   ໃນຕອນທ້າຍຂອງພິທີ ຍັງໄດ້ຮັບຟັງການໂອ້ລົມຂອງທ່ານ ນາງ ຈັນສະໄໝ ລາວຊ່ຽວ ຄະນະປະຈໍາພັກເມືອງຫົວໜ້າຄະນະຈັດຕັ້ງເມືອງ ເຊິ່ງກ່ອນອື່ນທ່ານໄດ້ຍົກໃຫ້ເຫັນຜົນງານ ແລະ ໄຊຊະນະແຫ່ງການນໍາພາຂອງພັກຕໍ່ກັບວຽກງານການຕໍ່ສູ້ກູ້ຊາດ ແລະ ການພັດທະນາສ້າງສາປະເທດຊາດໃນປະຈຸບັນ ຈາກນັ້ນກໍ່ຍັງໄດ້ຮຽກຮ້ອງມາຍັງພະນັກງານ-ລັດຖະກອນ, ທະຫານ-ຕໍາຫລວດ ຈົ່ງເອົາໃຈໃສ່ໃນການປະກອບສ່ວນເຂົ້າໃນວຽກງານການເຊື່ອມຊຶມເອກະສານໃນແຕ່ລະໄລຍະໃຫ້ສະມາຊິກພັກ, ພະນັກງານ-ລັດຖະກອນໃນຂອບເຂດຄວາມຮັບຜິດຊອບຂອງຕົນໃຫ້ເປັນປົກກະຕິ, ເອົາໃຈໃສ່ປະຕິບັດກົດໝາຍວ່າດ້ວຍພະນັກງານ-ລັດຖະກອນໃຫ້ເຂັ້ມງວດ ພ້ອມກັນນໍາເອົາເນື້ອໃນບັນດາບົດມູນເຊື້ອດັ່ງກ່າວໄປໝູນໃຊ້ ເຂົ້າໃນວຽກງານໃນຂອບເຂດຄວາມຮັບຜິດຊອບຂອງຕົນໃຫ້ມີການພັດທະນາເທື່ອລະກ້າວ.