ແຂວງຜົ້ງສາລີດຳເນີນກອງປະຊຸມຄົບຄະນະບໍລິຫານງານພັກແຂວງຄັ້ງທີ 2 ສະໄໜທີ XI

ສ້າງຂື້ນເມື່ອ ວັນສຸກ, 23 ຕຸລາ 2020 07:56
ຂຽນໂດຍ ແສງຄຳ ສາລີວັນ
ແຂວງຜົ້ງສາລີດຳເນີນກອງປະຊຸມຄົບຄະນະບໍລິຫານງານພັກແຂວງຄັ້ງທີ 2 ສະໄໝທີ XI.
     ກອງປະຊຸມຄົບຄະນະບໍລິຫານງານພັກແຂວງພັກແຂວງຄັ້ງທີ 2 ສະໄໝທີ XI ໄດ້ຈັດຂຶ້ນໃນຕອນເຊົ້າຂອງວັນທີ່ 21 ຕຸລາ 2020 ຢູ່ທີ່ຫ້ອງປະຊຸມຊັ້ນ 5 ຂອງຫ້ອງວ່າການແຂວງຜົ້ງສາລີ. ໂດຍພາຍໃຕ້ການເປັນປະທານຂອງ ສະຫາຍ ຄຳຜອຍ ວັນນະສານ ເລຂາຄະນະບໍລິຫານງານພັກແຂວງ, ເຈົ້າແຂວງໆຜົ້ງສາລີ, ມີບັນດາສະຫາຍຮອງເລຂາຄະນະບໍລິຫານງານພັກແຂວງ, ກຳມະການປະຈຳພັກແຂວງ, ກຳມະການພັກແຂວງ, ພາຍໃນຄະນະບໍລິຫານງານພັກແຂວງສະໄໜທີ XI ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
     ສະຫາຍ ຄຳຜອຍ ວັນນະສານ ເລຂາຄະນະບໍລິຫານງານພັກແຂວງ, ເຈົ້າແຂວງໆຜົ້ງສາລີກ່າວບາງຕອນວ່າ: ການດຳເນີນກອງປະຊຸມຄົບຄະນະບໍລິຫານງານພັກແຂວງຄັ້ງທີ 2 ສະໄໝທີ XI ແມ່ນເປັນການປະຕິບັດກົດລະ ບຽບຂອງພັກປະຊາຊົນປະຕິວັດລາວສະໄໝທີ X ແລະ ປະຕິບັດຕາມມະຕິຕົກລົງຂອງຄະນະເລຂາທິການສູນກາງພັກ ສະບັບເລກທີ 177/ຄລສພ, ລົງວັນທີ 10 ຕຸລາ 2020 ວ່າດ້ວຍການຮັບຮອງເອົາຄະນະບໍລິຫານງານພັກແຂວງ ສະໄໝທີ XI. ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອສ້າງຄວາມເປັນເອກະພາບຕໍ່ບັນດາເອກະສານເນື້ອໃນສຳຄັນຕ່າງໆທີ່ເປັນຮ່າງ ຜ່ານກອງປະຊຸມໃຫຍ່ຜູ້ແທນອົງຄະນະພັກແຂວງຜົ້ງສາລີຄັ້ງທີ XI ບົນພື້ນຖານເພື່ອເປັນການຜັນຂະຫຍາຍຜົນສຳເລັດ ຂອງກອງປະຊຸມໃຫຍ່ຜູ້ແທນອົງຄະນະພັກແຂວງ ໃຫ້ເປັນແຜນງານ, ໂຄງການອັນລະອຽດ ແລະ ເປັນຄວາມຮັບຜິດຊອບຂອງບັນດາສະຫາຍຄະນະບໍລິຫານງານພັກແຂວງ. ໄປພ້ອມໆກັນນັ້ນກໍເພື່ອກວດກາປັບປຸງຄືນ ລະບົບການເຮັດວຽກຂອງຄະນະບໍລິຫານງານພັກແຂວງຊຸດໃໝ່ນີ້ ເພື່ອໃຫ້ສອດຄ່ອງກັບສະພາບຄວາມເປັນຈິງ, ເພື່ອເປັນບ່ອນອີງໃຫ້ແກ່ບັນດາສະຫາຍຄະນະບໍລິຫານງານພັກແຂວງໃນການເຄື່ອນໄຫວ ແລະ ຈັດຕັ້ງປະຕິບັດໜ້າທີ ກໍ່ຄືວຽກງານຂອງຕົນໃຫ້ຖືກຕ້ອງ ແລະ ສອດຄ່ອງ. ໃນກອງປະຊຸມຄັ້ງນີ້ຍັງໄດ້ຜ່ານມະຕິຕົກລົງຂອງຄະນະເລຂາທິການສູນກາງພັກ ສະບັບເລກທີ 177 /ຄລສພ, ລົງວັນທີ 10 ຕຸລາ 2020 ວ່າດ້ວຍການຮັບຮອງເອົາ ຄະນະບໍລິຫານງານພັກແຂວງສະໄໝທີ XI, ຜ່ານຮ່າງແຜນດຳເນີນງານຂອງຄະນະບໍລິຫານງານພັກແຂວງ ສະໄໝທີ XI ( 2021-2025 ), ຜ່ານຮ່າງລະບົບແບບແຜນວິທີເຮັດວຽກຂອງຄະນະບໍລິຫານງານພັກແຂວງ, ກຳມະການປະຈຳພັກແຂວງ. ພ້ອມນັ້ນກອງປະຊຸມຍັງໄດ້ຜ່ານບົດຕີລາຄາກ່ຽວກັບທ່າແຂງ ແລະ ທ່າອ່ອນຂອງບັນດາສະຫາຍກຳມະການປະຈຳພັກແຂວງ, ກຳມະການພັກແຂວງ, ຈະໄດ້ຜ່ານມະຕິຕົກລົງຂອງຄະນະປະຈຳພັກແຂວງ ວ່າດ້ວຍການແບ່ງຄວາມຮັບຜິດຊອບພາຍໃນຄະນະບໍລິຫານງານພັກແຂວງ.
     ກອງປະຊຸມຄົບຄະນະບໍລິຫານງານພັກແຂວງຄັ້ງທີ 2 ສະໄໝທີ XI ໄດ້ດຳເນີນເປັນເວລາ 3 ວັນ ຄືແຕ່ວັນທີ 21-23 ຕຸລາ 2020 ຈື່ງສຳເລັດລົງຢ່າງຈົບງາມ.